GUDEM CHEPPINA KATHALU

తలలు బ్రద్దలు కొట్టుకునే జనాల మధ్య.. ఆరోజు గూడెంలో క్లాసు ముగించి ఇంటికి బయ ల్దేరేను. చీకటి రాత్రులు. వీధి దీపాలు ఎక్కడా వెలగడం లేదు. చేతిలో టార్చ్ లైటు దారి చూపిస్తూంటే గబగబా నడుస్తున్నాను. వీధిలో పెద్దగా అలికిడి లేదు. రోడ్డుకి రెండువైపులా ఉన్న ఇళ్ళల్లోంచి పలుచని వెలుతురు మాత్రం బయటకు పాకుతోంది. గూడెం పొడవునా ఉన్న చర్చిల్లోంచి రికార్డులు వినిపిస్తున్నాయి. క్రిస్మస్ దగ్గరకొస్తోంది. ఇకపైన గూడెమంతా బోలెడు సందడి మొదలవుతుంది. ప్రక్కన ఏదో అలికిడి అనిపించి తల త్రిప్పబోయేసరికి తలమీద దెబ్బ పడింది... తలమీద చేత్తో తడుముకుంటూ, "ఎవరది?" అంటూ వెనక్కి తిరగబోయేంతలో మరో దెబ్బ. చేతిలో టార్చి జారిపోయింది. "అబ్బా!", అంటూ రెండు చేతులతో తల పట్టుకున్నాను. ఎవరో వెనుక పరుగెడుతున్న చప్పుడుతో పాటు "గట్టిగా కొట్ట లేదు కదరా” గుసగుసగా ఎవరిదో పరిచయమున్న గొంతులాగే ఉంది.