KANNEGANTI HANUMANTHU

ఈ పుస్తకం గురించి... ప్రాణం అమూల్యమైనది. త్యాగం అజరామరమైనది. కన్నెగంటి హనుమంతు ప్రాణత్యాగం పల్నాటికి కీర్తికిరీటం. కన్నెగంటి హనుమంతు మా పల్నాడు ప్రాంత జాతీయోద్యమ నాయకుడు. బ్రిటీషు తుపాకీ తూటాలకు ఆత్యత్యాగం చేసినవాడు. తెల్లవారి ప్రలోభాలకు తలొగ్గకుండా. ప్రజాశ్రేయస్సు కోసమే జీవితాన్ని అర్పించినవాడు. అలాంటి త్యాగమూర్తి జీవిత గమనాన్ని అక్షరబద్ధం చేసే అవకాశం కలగడం నా అదృష్టం. కథనం చిన్నదే అయినా భావం చాలా విస్తృతమైనది. కన్నెగంటి పోరాటం, ప్రాణత్యాగం పల్నాడుకు శోభాయమానం. ఆయన ఆదర్శ జీవనం కేవలం పల్నాటికే గాకుండా యావత్ భారత్కు సార్వకాల ఆచరణీయ మార్గదర్శనమే. కన్నెగంటిని గుర్తు చేసుకోవడమూ, స్మరించుకోవడమే ఆయనకు నివాళి కాదు. ఆయన అడుగుజాడలలో కనీసం ఒక్క అడుగైనా వేయడమే ఆయనకు మనమిచ్చే కృతజ్ఞతాంజలి. కన్నెగంటి జీవిత చరిత్రను వందల పుటలుగా మలచవచ్చు. చదువరులు సులభంగా ఆకళింపు చేసుకోవటానికి కథాంశాన్ని సంక్షిప్తం చేశాను. ఈ కథనాన్ని ఆవిష్కరిస్తున్న ఆం.ప్ర. ముఖ్యమంత్రివర్యులు మాన్యశ్రీ నారా చంద్రబాబు నాయుడు గారికీ, పెద్దమనసుతో స్వీకరిస్తున్న గురజాల నియోజకవర్గ శాసనసభ్యులు మాన్యులు శ్రీ యరపతినేని శ్రీనివాసరావు గారికీ, ప్రోత్సాహమిచ్చిన సంధాన కర్తలకు, ముద్రణకు సహకరించిన నిర్మాణకర్తలకు, వర్ణమాల సముదాయాన్ని గుదిగుచ్చి ఈ పుస్తకాన్ని రంగవల్లిగా తీర్చిన గౌరవనీయ కలిమిశ్రీ గారికి నా కృతజ్ఞతలు. ఇక ఈ కథనంలోకి ప్రవేశిద్దాం... -వై.హెచ్.కె.మోహన్రావు